Golfklúbburinn Oddur fékk viðurkenningu sem Fyrirmyndarfélag ÍSÍ á ársþingi Ungmennasambands Kjalarnesþings sem var haldið í félagsheimili Odds fimmtudaginn 30. mars síðastliðinn.  Það voru fulltrúar ÍSÍ á þinginu, þau Hafsteinn Pálsson 2. varaforseti ÍSÍ, Garðar Svansson og Olga Bjarnadóttir, öll úr framkvæmdastjórn, sem afhentu þeim Kára Sölmundarsyni formanni félagsins og Hrafnhildi Guðjónsdóttur íþróttastjóra viðurkenninguna.  Á myndinni eru frá vinstri, Olga Bjarnadóttir, Kári Sölmundarson, Hrafnhildur Guðjónsdóttir, Hafsteinn Pálsson og Garðar Svansson.

„Þetta var stór dagur fyrir Golfklúbbinn Odd.  Undirbúningurinn hefur tekið nokkurn tíma og undirstrikar viðurkenningin það góða starf sem við vinnum í klúbbnum.  Nú getum við unnið markvisst að betra og öflugra íþróttastarfi eftir kröfum ÍSÍ til íþróttafélaga.  Bjartir tímar eru framundan og við hjá GO tökum stolt við þessari gæðaviðurkenningu frá ÍSÍ“ sagði Hrafnhildur Guðjónsdóttir íþróttastjóri félagsins af þessu tilefni.