Þann 18. apríl, á 72. Íþróttaþingi ÍSÍ, var útnefnt í Heiðurshöll ÍSÍ í tíunda og ellefta sinn.
Gunnar A. Huseby frjálsíþróttamaður og Torfi Bryngeirsson frjálsíþróttamaður voru útnefndir í Heiðurshöllina. Gunnar og Torfi voru báðir framúrskarandi íþróttamenn.

Gunnar Alexander Huseby fæddist 4. nóvember 1923 og lést 28. maí 1995. Hann hóf ungur að æfa bæði knattspyrnu og frjálsíþróttir og var mjög fjölhæfur. Á drengjamóti ÍSÍ sumarið 1940, þegar hann var 16 ára, tók hann þátt í 9 greinum af þeim 12 sem keppt var í. Þar sigraði hann í langstökki, hástökki, kúluvarpi, kringlukasti og 400 m hlaupi og setti drengjamet í báðum síðasttöldu greinunum. Síðar einbeitti Gunnar sér að kastgreinum, einkum kúluvarpi og kringlukasti og setti fjölda Íslandsmeta. Sumarið 1944 kastaði hann kúlu 15,50 m, sem var fjórða lengsta kast í heiminum það árið en Gunnari gáfust fá tækifæri á að etja kappi við erlenda íþróttamenn á þessum árum vegna heimstyrjaldarinnar. Á Evrópumeistaramótinu í Osló 1946 keppti Gunnar í kúluvarpi og sigraði með yfirburðum. Þá var hann á 23. aldursári. Kastaði hann þar kúlunni 15,56 metra eða 30 cm lengra en næsti maður. Fyrr þetta sumar hafði hann sett Íslandsmet bæði í kúluvarpi og kringlukasti. Á Evrópumeistaramótinu í Brussel 1950 varði hann Evrópumeistaratitil sinn – eini íslenski frjálsíþróttamaðurinn sem náð hefur þeim árangri. Varpaði hann þar kúlunni 16,74 metra sem var nýtt Íslands-, Norðurlanda- og Evrópumet og lengsta kast hans á ferlinum. Þetta sigurkast var nær hálfum öðrum metra lengra en kast silfurverðlaunahafans og þetta Íslandsmet hans stóð í 17 ár. Sama ár setti hann einnig Íslandsmet í kringlukasti, 50,13 m sem stóð í mörg ár. 
Gunnar var afar vinsæll, dáður og eftirsóttur íþróttamaður, ekki bara hér á landi heldur einnig á Norðurlöndum og víða í Evrópu. Var honum boðið að keppa víða um heim. Alls varð Gunnar á sínum ferli tíu sinnum Íslandsmeistari í kúluvarpi, sex sinnum í kringlukasti og tvisvar í sleggjukasti. 
Gunnar eignaðist ekki afkomendur en Jökull Jörgensen, barnabarn hálfsystur Gunnars veitti viðurkenningunni viðtöku ásamt fleiri ættingjum Gunnars.

Torfi fæddist 11. nóvember 1926 og lést 16. júlí 1995. Hann ólst upp í Vestmannaeyjum og hóf snemma að æfa stangarstökk en á hans uppvaxtarárum var stangarstökkskeppni einn af hápunktum á Þjóðhátíð Vestmannaeyinga. Torfi setti fyrsta Íslandsmetið sitt í greininni sumarið 1947 er hann stökk 3,70 metra. Torfi keppti á Ólympíueikunum í London árið 1948 og var nálægt því að komast í úrslit. Á Evrópumeistaramótinu í Brussel 1950 keppti hann í stangarstökki og langstökki, sem var hans aukagrein, og komst í úrslit í báðum greinum. Þegar til kom reyndist úrslitakeppni í greinunum fara fram á sama tíma. Torfi taldi sigurlíkur sínar í langstökki meiri en í stangarstökki og kaus því að keppa í úrslitum í langstökki. Torfi stökk 7,32 metra, 12 cm lengra en næsti maður, og varð Evrópumeistari í langstökki. Mögulega hefði hann einnig átt sigurmöguleika í stangarstökki mótsins sem vannst með stökki upp á 4,30 metra. 
Þann 29. Júní 1951 tóku Íslendingar þátt í þriggja landa frjálsíþróttakeppni í Osló, ásamt Dönum og Norðmönnum og báru sigur úr býtum, eins og frægt er orðið. Torfi sigraði þar í langstökki og stangarstökki, þar sem hann var hársbreidd frá því að setja Evrópumet og hljóp einnig endasprettinn í sigri íslensku boðhlaupssveitarinnar í 4x100 m boðhlaupi mótsins. Sama sumar stökk hann 4,32 metra í stangarstökki sem var eitt besta stökkið í heiminum það árið. Sumarið 1952 setti Torfi Íslandsmet í stangarstökki, 4,35 metra og stóð met hans í nokkur ár. Síðasta stórmót hans var Evrópumeistaramótið í Bern 1954 þar sem hann komst í aðalkeppnina í stangarstökki en meiddist og varð að hætta keppni. Torfi var víðkunnur fyrir íþróttaafrek sín og má nefna að mynd af honum prýddi forsíðu breska íþróttablaðsins World Sports árið 1951. 

Ættingjar Torfa veittu viðurkenningunni viðtöku en fyrir hópnum fór sonur hans, Guðmundur Torfason. 
Lárus L. Blöndal, forseti ÍSÍ, Helga Steinunn Guðmundsdóttir varaforseti ÍSÍ og Líney Rut Halldórsdóttir framkvæmdastjóri ÍSÍ sáu um afhendingu viðurkenninganna. 

Heiðurshöll ÍSÍ var stofnuð þann 28. janúar 2012 í tilefni af 100 ára afmæli ÍSÍ og var Vilhjálmur Einarsson fyrstur tekinn þar inn. Hér má sjá Heiðurshöll ÍSÍ.