Sunnudaginn 12. maí s.l. var 26. Ársþing Keilusambands Íslands (KLÍ) haldið í Íþróttamiðstöðinni Laugardal. KFR sá að þessu sinni um að hýsa þingið og á þingið mættu fulltrúar allra aðildarfélaga nema Þórs. Á þinginu sátu sem áheyrnarfulltrúar tveir aðilar frá Íþróttafélaginu Ösp. Ekki lágu mörg mál fyrir þinginu en ljóst var að kjósa þurfti tvo aðalfulltrúa til tveggja ára í stjórn. Björgvin Helgi frá Þór gaf ekki kost á sér til áframhaldandi setu en S. Unnur Vilhjálmsdóttir frá KFR gaf kost á sér. Hún ásamt Einari Jóel frá ÍA voru ein í framboði til aðalmanna í stjórn og voru því sjálfkjörin. Þrír gáfu kost á sér sem varamenn til eins árs og kom það í hlut Kjörnefndar að gera tillögu að röðun þeirra sem var samþykkt samhljóða en þeir eru í þessari röð: Stefán Ingi Óskarsson frá KFR, Stefán Claessen frá ÍR og Björn Kristinsson frá KR.

Hafsteinn Pálsson úr framkvæmdastjórn ÍSÍ var fulltrúi ÍSÍ á þinginu.

Á þinginu voru tveir aðilar sæmdir heiðursmerki KLÍ. Guðmundur Sigurðsson ÍA var sæmdur Gullmerki KLÍ fyrir áratuga störf sín í þágu keilunnar á Íslandi. Guðmundur er aðalmaðurinn á bakvið Keilufélag Akraness sem keppir undir merkjum ÍA. Svavar Þór Einarsson ÍR var sæmdur Silfurmerki KLÍ fyrir störf sín í þágu keilunnar en Svavar hefur s.l. 3 ár verið aðalmaðurinn á bakvið Mótanefnd KLÍ auk þess að sinna öðrum störfum, svo sem formaður ÍR Keiludeildar s.l. ár.

Þinggerð má sjá hér og Ársskýrslu KLÍ má sjá hér.

Á myndunum má sjá Jóhann Ágúst Jóhannsson formann KLÍ ásamt annars vegar Svavari Þór Einarssyni sem var sæmdur Silfurmerki KLÍ og hins vegar Guðmundi Sigurðssyni sem sæmdur var Gullmerki KLÍ.