Engu var til sparað þegar aðrir Evrópuleikarnir voru settir í Minsk, höfuðborg Hvítarússlands í kvöld.

Setningarhátíðin var að umfangi í anda Ólympíuleika með sögulegu ívafi, tónlist og íþróttum. Hinn nýuppgerði Dinamo leikvangur í miðbæ Minsk skapaði skemmtilega umgjörð sem sýndi sögulegan leikvang í bland við nýjustu tækni og viðbyggingar.

Forseti Hvítarússlands, Alexander Lukashenko, setti leikana formlega en einnig ávarpaði forseti EOC Janez Kocijančič þátttakendur og aðra áhorfendur. Fulltrúar 50 þjóða taka þátt í leikunum og eru keppendur tæplega 4.000 talsins.

Hápunktar hátíðarinnar voru án efa innganga íþróttamanna og þegar Ólympíueldurinn var tendraður í lok hátíðarinnar og flugeldasýning lýsti upp himininn.

Ásgeir Sigurgeirsson, keppandi í skotfimi á leikunum, var fánaberi íslenska hópsins, en forseti ÍSÍ Lárus L. Blöndal og Líney Rut Halldórsdóttir, framkvæmdastjóri ÍSÍ voru á meðal áhorfenda.

Alls komu 1.300 manns að undirbúningi og framkvæmd hátíðarinnar, eða yfir 500 listamenn, 700 sjálfboðaliðar og notast var við 1.200 búninga. Undirbúningur hennar stóð yfir í meira en ár.