Lárus L. Blöndal, forseti ÍSÍ, sæmdi í gær Sigmund Hermundsson Gullmerki ÍSÍ, samkvæmt ákvörðun framkvæmdastjórnar ÍSÍ, fyrir góð störf í þágu íþrótta á Íslandi. Afhending viðurkenningarinnar fór fram á heimili Sigmundar í Garðabæ.

Sigmundur hefur komið víða við í störfum sínum fyrir íþróttahreyfinguna og setið í stjórnum íþróttafélaga, íþróttahéraðs og sérsambands. Sigmundur var fjölhæfur íþróttamaður og keppti í handknattleik, knattspyrnu og frjálsíþróttum á sínum íþróttaferli. Hann sat m.a. í stjórn Frjálsíþróttasambands Íslands, Ungmennasambands Borgarfjarðar, Umf. Íslendings og í stjórnum bæði handknattleiksdeildar og knattspyrnudeildar Umf. Stjörnunnar. Hann sinnti einnig hlutverkum liðsstjóra og fararstjóra í mörgum verkefnum innan hreyfingarinnar.

ÍSÍ óskar Sigmundi til hamingju með heiðursviðurkenninguna, með þakklæti fyrir hans góða framlag til íþróttahreyfingarinnar í gegnum árin.