Landsliðshópurinn í klassískum kraftlyftingum gerði góða ferð á HM í Suður-Afríku. Árangur liðsins á mótinu er besti heildarárangur í sögu Kraftlyftingasambands Íslands (KRAFT) og hefur vakið mikla athygli, skv. fréttatilkynningu frá KRAFT.

Hæst tróna silfurverðlaun Kristínar Þórhallsdóttur í -84kg flokki. Þær Kristín og Lucie Stefanikova unnu fern greinaverðlaun, tvenn silfurverðlaun og tvenn bronsverðlaun. Þær settu svo Evrópumet fimm sinnum á mótinu. Kristín tvíbætti Evrópumetið í hnébeygju og tvíbætti Evrópumetið í samanlögðu í -84kg flokki. Lucie bætti Evrópumetið í hnébeygju í -76kg flokki.

Keppendur settu samtals 17 Íslandsmet.

Íslensku keppendurnir skipuðu sér í 2., 8., 12., 13., 15., 17. og 17. sæti á þessu óvenju fjölmenna og sterka móti.

ÍSÍ óskar KRAFT og landsliðinu innilega til hamingju með árangurinn á mótinu.

Mynd/KRAFT.