Á hverju ári er 8. nóvember haldinn hátíðlegur því sá dagur er tileinkaður baráttunni gegn einelti.  Dagurinn hefur verið kallaður „Dagur gegn einelti” en markmið hans er að minna okkur á mikilvægi þess að sporna við og stoppa einelti þegar við verðum þess vör, en einnig að efna til umræðu, fræðslu og viðburða og hvetja til jákvæðra samskipta og efla vináttu.  

Í morgun bauð Heimili og skóli til athafnar í Hólabrekkuskóla í Breiðholti og var aðaltilefnið afhending hvatningarverðlauna til þess einstaklings eða hóps sem þótti hafa borið af í baráttunni gegn einelti. Guðna Th. Jóhannessyni, forseta Íslands, og Ásmundi Einari Daðasyni, ráðherra mennta- og barnamála, var boðið á samkomuna auk annarra góðra gesta.  Fjölmargar tilnefningar bárust en það var Lilja Ósk Sigurjónsdóttir, verkefnastjóri forvarna- og félagsmála við Tækniskólann sem hlaut verðlaunin að þessu sinni.  Lilja hefur með elju sinni og áhuga unnið ötullega gegn einelti og stutt marga minnihlutahópa um leið, á sinni vegferð.  Henni var þakkað vel fyrir hennar framlag til baráttunnar gegn einelti.  

Reglulega sprettur upp umræða um einelti og/eða samskiptavanda og hefur undanfarið verið áberandi neikvæð umræða í garð samkynhneigðra, trans og kynsegin fólks og fólks af erlendum uppruna.  Á þetta bæði við um fullorðna sem og börn og unglinga.  Það er ábyrgð þeirra sem eldri eru að upplýsa og fræða hina ungu og tryggja þannig að allir geti lifað í sátt og samlyndi hvert með öðru enda erum við öll ólík og fögnum fjölbreytileikanum.

Íþrótta- og Ólympíusamband Íslands (ÍSÍ) er aðili að þjóðarsáttmála gegn einelti þar sem allir eru hvattir til að leggja sitt af mörkum til að einelti fái ekki þrifist í samfélaginu. ÍSÍ hvetur alla, jafnt í íþróttahreyfingunni sem og annars staðar, til að vanda til verka og hjálpast að við að koma í veg fyrir eða stoppa einelti, verði þeir þess varir.  

ÍSÍ bendir sambandsaðilum og íþrótta- og ungmennafélögum innan þeirra vébanda á samræmda viðbragðsáætlun fyrir íþrótta- og æskulýðsstarf þar sem finna má greinargóðar upplýsingar varðandi málaflokkinn og þá ekki síst hvernig bregðast skal við tilkynningum er varða samskiptavanda eða einelti. 

Þú getur nálgast viðbragðsáætlunina hér!