ÍSÍ hefur úthlutað styrkjum úr Ferðasjóði íþróttafélaga vegna ferðakostnaðar íþrótta- og ungmennafélaga vegna þátttöku í fyrirfram skilgreindum styrkhæfum mótum ársins 2024.Til úthlutunar að þessu sinni voru um 123,9 milljónir króna.

Til sjóðsins bárust 255 umsóknir frá 126 íþrótta- og ungmennafélögum úr 24 íþróttahéruðum vegna 3.211 ferða í 24 íþróttagreinum.

Heildarupphæð umsókna var 757.596.246,- krónur en þess má geta að umsækjendur skrá einungis beinan ferðakostnað í umsóknir, ekki gistingu eða uppihald. Gistikostnaður er valkvæð skráning í umsóknir til sjóðsins og var skráður gistikostnaður í umsóknum um 145 milljónir króna.

Styrkirnir eru greiddir út beint til viðkomandi íþrótta- og ungmennafélags, skv. umsóknum. Umsækjendur geta nú farið inn í umsókn sína í gegnum vefslóðina sem fylgdi stofnun umsóknarinnar og séð úthlutun styrkja pr. ferð.

Unnið er að uppfærslum í umsóknarkerfinu og verður opnað fyrir nýtt umsóknartímabil í kerfinu að þeim loknum.

Vinnuhópur ÍSÍ um Ferðasjóð íþróttafélaga er bakland fyrir skrifstofu ÍSÍ varðandi málefni þessa mikilvæga sjóðs. Þau sem sitja í vinnuhópnum eru Valdimar Leó Friðriksson formaður, Árni Ólason, Engilbert Olgeirsson, Jóhann Króknes Torfason, Helga Sigrún Þórsdóttir og Ragnheiður Ríkharðsdóttir. Skrifstofa ÍSÍ annast yfirlestur umsókna og vinnur tillögu að úthlutun, í samræmi við samþykktar forsendur og í samráði við vinnuhópinn, sem síðan er lögð fyrir framkvæmdastjórn ÍSÍ til umfjöllunar og samþykktar.Sjóðurinn hefur fengið árlegt framlag af fjárlögum Alþingis síðan árið 2007 og er haft samráð við mennta- og barnamálaráðuneytið um allar breytingar á grunnforsendum útreiknings styrkja.

Framlag ríkisins til sjóðsins skiptir íþróttahreyfinguna gríðarlega miklu máli enda ferðakostnaður íþróttahreyfingarinnar stór þáttur í rekstri flestra íþróttafélaga, ekki síst á landsbyggðinni. Þó aðeins hluti mótahalds í landinu sé styrkhæfur í sjóðnum þá endurspegla umsóknir í Ferðasjóð íþróttafélaga gríðarlegt umfang ferðalaga og ferðakostnaðar í íþróttastarfinu á landsvísu og þær miklu áskoranir sem íþróttafélögin í landinu, og þá aðallega í dreifðari byggðum landsins, þurfa að mæta í rekstrinum til að veita iðkendum sínum tækifæri til þátttöku í íþróttamótum.

Upplýsingasíða sjóðsins.

Skipting úthlutunar pr. íþróttahérað: